María José Ginzo recolleu o Premio á Mellor Tese en Humanidades Dixitais

O galardón, concedido pola Sociedade Internacional de Humanidades Dixitais Hispánicas e a Fundación BBVA, celebra o potencial da estatística para desvelar a relación entre a lingua, a historia, a xeografía e a cultura. Analizar a distribución xeográfica dos apelidos para estudar os movementos da poboación, centrándose en Galicia e ampliando a análise a outras rexións españolas, é o obxectivo da tese Técnicas estadísticas en geolingüística. Modelización onomástica, da profesora da Facultade de Matemáticas e membro do CITMAga María José Ginzo Villamayor, que lle valeu o III Premio á Mellor Tese Doutoral en Humanidades Dixitais da Sociedade Internacional de Humanidades Dixitais Hispánicas (HDH) e a Fundación BBVA, cuxa cerimonia de entrega se celebrou este xoves.